Rafiki Yangu,
Unataka kubadilisha maisha yako, lakini unasubiri kesho?
Habari njema ni kwamba huanzi na mbio ndefu, unaweza kuanza na kurasa chache tu leo.
Watu wengi hukosa mabadiliko kwa sababu wanaamini lazima waanze na hatua kubwa, ghafla, na kwa ukamilifu.
Wanafikiria:
*Nikianza, lazima nikamilishe kitabu kizima mara moja*
*Nikianza mazoezi, lazima niwe na vifaa vyote.*
*Nikianza kujifunza, lazima nijitose kikamilifu.*
Matokeo yake, wanachelewesha kuanza kwa wiki, miezi, hata miaka.
David Goggins katika Kitabu Chake Cha *Can’t Hurt Me* anasema ukweli mchungu:
Sababu kubwa ya kushindwa ni kutosogea hata hatua ya kwanza.
Watu wanabaki kwenye mipango na maono, wakisubiri wakati *mzuri*, wakati ambao mara nyingi haujawahi kufika.
Mabadiliko ya kweli yanahitaji uvumilivu, uthubutu, na nidhamu, lakini kila moja huanza na hatua ndogo, rahisi, na inayoonekana ndogo mno.
Kwenye ulimwengu wa kusoma, hatua hii ndogo ni kurasa chache tu za kwanza.
Fikiria historia ya Musa, fundi umeme kutoka Tanga.
Musa alikuwa anapenda sana kuboresha maisha yake lakini kila aliponunua kitabu cha motisha, alikiweka kwenye sakafu akisema:
*Nitakisoma wakati nitakapopata muda.*
Miaka ikapita, vitabu vikaendelea kukusanya vumbi.
Siku moja, baada ya kusikiliza mahojiano ya David Goggins, aliguswa na maneno:
*Don’t wait for the perfect moment. Start with what you can do now.*
Siku hiyo, alichukua kitabu kimoja alichonunua miaka miwili iliyopita.
Badala ya kulazimisha sura nzima, alisoma kurasa tatu tu kabla ya kulala.
Kesho yake, akasoma kurasa tano.
Baada ya wiki moja, alikuwa amemaliza sura mbili na alikuwa na mazoea mapya:
Kusoma kila siku kabla ya kulala, haijalishi ni kurasa ngapi.
Baada ya miezi sita:
Alimaliza vitabu vitatu vya biashara.
Aliandika mpango wa kupanua huduma zake za umeme.
Alianza kufanya matangazo madogo mitandaoni, na kupata wateja wapya 40% zaidi.
Musa alitabasamu na kusema, *Mabadiliko yangu hayakuanza na mpango mkubwa, yalianza na kurasa tatu tu.*
Dakika 5 za Kuanza Mabadiliko Yako Leo
Hatua 1: Chagua Kitabu
Kichague kulingana na lengo lako la sasa.
Kama ni fedha, chukua kitabu cha fedha; kama ni afya, chukua kitabu cha afya.
Hatua 2: Weka Muda wa Kudumu
Mfano: Kila siku saa 3:00 usiku kabla ya kulala, au saa 6:00 asubuhi kabla ya simu.
Hatua 3: Soma Kurasa 2–5 Tu
Hii ni rahisi sana, haitakubebesha presha. Lengo ni kuunda mazoea, si kumaliza mara moja.
Hatua 4: Andika Kitu Kimoja Ulichojifunza
Hata nukta moja tu inatosha.
Hatua 5: Tumia Kitu Hicho Ndani ya Masaa 24
Usiahirishe utekelezaji. Mara tu unapokisoma, tafuta njia ya kukitumia.
Faida Za Kutumia Mbinu Hii.
Inavunja hofu ya kuanza hatua ndogo huondoa vizuizi vya kisaikolojia.
Inajenga tabia endelevu, mazoea madogo lakini ya kila siku huzaa matokeo makubwa.
Inakuza nidhamu unapojifunza kufanya kidogo kila siku, unajenga msimamo.
Inakupa matokeo ya haraka unaweza kuona mabadiliko ndani ya wiki moja.
Inakufundisha uvumilivu badala ya kusubiri mabadiliko makubwa, unafurahia maendeleo madogo ya kila siku.
Inakuondoa katika kundi la *watazamaji* na kukupeleka kwenye kundi la *watendaji*
Leo, acha kusubiri wakati unaofaa.
Chukua kitabu kimoja kilicho karibu nawe sasa.
Soma kurasa mbili tu.
Andika kitu kimoja kutoka humo na kitumie kesho.
Hii ni hatua ndogo, lakini kama David Goggins anavyosema:
*Step into discomfort daily, because growth lives there.*
Kesho utakapoangalia nyuma, utagundua mabadiliko makubwa yalianza na kurasa chache tu leo.
Rafiki Anayekupenda Na Kukujali Sana,
Ramadhani Amir,
0750376891.
.webp)
Maoni
Chapisha Maoni